2023 真係太忙，忙到一年一post都甩咗。
無啦啦接任上位，對住班老臣子突然要去manage佢哋，係要摸索，係要磨合。對住個從來唔放CEO喺眼内嘅，我覺得無問題，只要交到數對公司好我ok；無嘅咁為咗公司、公平，我cut budget係你俾位我入咋。
要打executive summary同host board meeting，唔慣 x 緊張，勉强應付。
開始要習慣上台發噏瘋，尤其要習慣用普通話。唔想但係都要build up self image。同時picked up協會理事、商業/研究院所嘅panel
member (but ZERO participation)。見多咗世面、唔同角度，不知不覺好似再一次快速成長。
慢慢make changes 去改變公司，慢慢向我理想嘅模式轉營，value first，都係想公司profitable同永續; HR + Digitalization + Integrated
System.
二月“途經”State College，好多嘢好多感受喺裡面爆出嚟；行過曾經熟悉嘅地方，感嘆周圍嘅變化，去返當年嘅commons，食返當年嘅嘢，只可惜2日時間太短，好難一一再重新體會感受，就算半夜自己揸返Old Main路過Hammond，再去埋Parkway 望一望，唔夠呀。
再入Medrad，身份角色唔同咗，但親切又陌生，認到舊人同見到啲SALs，又係多重滋味。
唔同客戶夏秋來訪，好感激有幸Bayer Pittsburgh同北京最高都有嚟過，keep到relationship。
十一月經引薦去Bayer Leverkusen 嘅Supplier Day再經Koln落Berlin參觀dark factory；初體驗。
地如祈攞到，位置真係好好，最終係原本利誘我哋嗰塊。奠基、設計、招標、動土，因為ASRS對倉庫地基有要求所以並行搵供應商，最理想當然係Dematic，先以其要求作參考規劃。見識過蘇煙嘅立庫同多川，11條line throughput係180k 件。之後見佛山大眾用嘅蘭劍，近呀，國產之光。年尾參觀Siemens
Numerical Control，好多嘢學好多嘢諗。
第一屆Associate唔係好理想但係係一個好開始。
七月第一次同老婆阿女出去旅行，行程原本好充實，但落機即遇特級颱風直劏日本，大阪全停；加埋高估佢哋體質，所以現實係去/做咗預計一半，不過已經好滿足。去埋奈良、京都。我好鍾意嗰度。難得老婆接受當地飲食，鍾意食白雞湯拉麵。
年尾兄弟路過HK 係呀又BBQ，反正友共情不變，做咩唔緊要。提起去爬富士山，好呀。
23年成年落嚟好忙，無個人時間無個人空間，身心真係好攰。模模糊糊已經2024。
第一次攞正牌同人講數係喺Dubai Arab Health，多重臨場考驗。繼續Bayer之旅，先去北京，簡直係Bayer PennState師兄弟吹雞，有幸植樹；落浙江去傾SAL直情回到過去 – as process engineer x 當年Medrad工作經驗；再去蘇州，住Pan Pacific，仲記得當年Sanmina做去搵Richard。成個trip簡直就係重新經歷2007前光景。
今年大滿貫。TUV SUD 1月同5月審CE MDR，6月FDA 5日audit，8月NMPA飛檢，9月又三類註冊再嚟二類註冊現場檢，加埋年頭ISO 14000，都大步檻過。
年頭開始傾MES，喺SSL先pilot做trial 再落CSL；同時要upgrade SAP，要上cloud，睇完SNC有考慮PLM，想PLM處理完master data再上SAP再連MES就正。結果真係一氣呵成，10月SAP同MES go live 不過到24年最後一日，同理想同我想要嘅嘢差好多好多。最大問題係老屎忽；狹窄嘅胸襟認知，石器嘅思維，做咗以為做好，自以為是人哋唔識我哋呢行，乜嘢都按目前模式去改全行都用緊嘅system，一人有一個夢想，睇少眼就仆街ed。不倫不類，二次上線CSL時我唯有獨裁獨尊。
7月第一屆Associate 報到，9月去貴大招人順便睇睇，間大學師資、facilities同project肯定好過香港啲大學，有研發合作機會；10-11月分3批interview，985, 211 同留學德國、香港嘅都有，碩士又有，希望揀咗嘅最後全部都入嚟。
CSL 11月封頂大吉，但倉庫未ready。佈局同裝修做緊，出面條路叫永勝路，地址係永勝路1號。
年尾出事，被邀協助調查實質做老臨協助砌生豬肉，無奈又可奈何?
4月租約期滿即刻搬離爛臭屋404。
今年夏天喺日本真係經歷過生死。上半部同老婆阿女東京玩，步伐無大阪咁衝，除咗打卡都係打卡。4揀2去咗Skytree 同Shibuya Sky俯覽夜景，有去Akihabara但阿女話東京駅一番街仲正。一家三口食雞皮串嗰餐好難忘，老婆鬧爆雞軟骨刺身。好鍾意 燒肉LIKE。頭尾都無同佢哋一齊去一齊返，不過有接機；可以同老婆拖手慢步澀谷，係遲咗，不過，又有同阿女去Sanrio Puroland，有啲等咗好耐“終於”成真嘅感覺。下半部係同James同Danny兄弟行。day 0 新宿meet，day 1 行 outlet行到missed咗last bus不過無壓力，大不了，反而敢博仲敢半路落車食烤肉最多行返去bnb。後尾先知條路係上落山，但有煙花嘆有浴衣少女𥄫，ok吖，久違嘅瀟灑闊達。我真係真係嚴重低估爬富士山，路唔容易行，爬要手腳並用，揸住碌竹不如拉實啲繩呀鏈呀。由2305 五合目到六合目，ok吖。頂，六合目上七合目開始斜撞正又雷又雨又霧，明明夏天一下變春天濕笠笠，眼鏡戴嚟都睇唔到。七合目上八合目係意志，成個人濕嗮同自己講要趕天黑前到hut唔好坨衰家。上到八合目已經接近無命，個背囊嗰刻好重，心諗好快到hut盡力頂呀。八合目同八點五合目距離又係幾層樓，去到hut啱啱好日落，好靚。入到hut換鞋時對鞋襪濕嗮，開始凍，對腳好似唔屬於自己。問到頂要行幾耐，有鑑我哋一路行踪緩慢加返個discount factor，寧可瞓少啲預多啲時間行唔想miss日出。8點lights off，好攰但瞓唔到，攤喺度右半身突然抽筋，拉直，頂。無耐起身去廁所，感覺越來越凍室外應該零上下。企得起身夾硬扯直個身，痛，好似得；攤低再瞓，又抽。真心諗過係咪應該就此放棄，唔想到時出事耽誤兄弟。夠鐘，起身，無抽；食埋，01:30準時如期出發。好多人，望上去係成排光點再望落去都係，頭尾成條光龍。好快跨九合目，望上去隱若見到光嘅盡頭。互相扶持，行一陣抖一抖，終於若4:30過鳥居登頂。佢哋話搵位等御來光，我唔想行，心諗淺間大社奧宮對住仲唔係對正御來光，唔理，坐低。睇到下低條光龍仲喺度，周圍亦越來越清晰。到御來光鹹蛋黃條邊嗰點初出時真係好感動，感激兄弟扶持終於做到，感恩可以同兄弟一齊見證嗰一刻。影好多相，食完個麵，整埋souvenir，唔再上郵局，望一望個山口，落山。仆仆轆轆，全程11.5個鐘上山，落山都5.5個鐘。落到五合目聽到話其實我哋上山前一日有一家三口俾雷劈俾人送咗落山，我哋爬嗰日又有落石有人受傷，我哋無穿無爛，多謝。又，返到東京有晚去Shibuya shabu-shabu，突然全場alarm響，以為火警，望手機，地震警告，電磁爐斷電，搖，望周圍，啲waitress/waiter 周圍望，其他人坐定定無意欲疏散，靜觀其變，停，無事，見其他枱開返爐繼續食，我哋都繼續。八卦，走去窗邊望落樓下，一切如常，無事，好似無嘢發生過，後來先知原來5.3級。嗰時唔識驚，亦都無諗如果有事會點。呢次兄弟行真係一齊經歷過生死。
又話大難不死必有後福，到年尾都無囉。12月尾阿妹阿媽返香港，攞假留香港，好似無咩特別嘢做咗，但平凡其實真係福。知道25更癲，要迎難而上，可以嘅，反正everyday is just another day.
