當我想起妳

解脫

有一種心情，唔係要得到啲咩，反而係失去啲咩嘅實在感。

以前工作面對嘅壓力唔係嚟自工作本身，而係嚟自環境，嚟自一切所安排，嚟自無理阻撓，嚟自無理之手推倒帶嚟嘅不知所謂莫名挫敗同冤辱。嗰種感覺就好似俾人困住喺個窿度，無論點爬somehow都有莫名嘅原因推返或者令我跌返落底，一切都似真疑假又唔知幾時有人會唔係灌水就丟石頭落個窿度時時都好危險好無助好不安嘅感覺。除咗無比嘅無力感、無窮無盡嘅絕望同失落，仲有隨時俾人愚弄嘅恐畏。

失落，心入面有個結越打越實，亦越嚟越沉重。一到夜晚攤喺張床好自然重複又重複質疑反問自己，我真係咁失敗?  我真係咁無用?  唔知，不過我唔忿氣，好唔忿氣。除咗抑鬱，仲有嘅就係驚慄。嗰陣嘅壓逼真係抖唔到氣。我開始逃避，逃避一切，逃離嗰度。可能亦都係機緣巧合，嗰次我都覺得被放棄。好，對大家都好。

轉咗工已經3個月，亦已提前過咗試用期。由於工作性質有少少唔同，係比以前辛苦，而依家亦比之前想像多咗好多出差，收工攤落張床都係攰，而成績撫心自問亦未到水平，係會自責，但係與其話係壓力，我反而覺得係推動力。

依家嘅工作都有挫敗，但好開心，邊度跌倒我邊度爬返起身，如果唔係我就蓄勢等機會。試過俾大老闆鏟到來回地獄又折返人間，事實又真係我嘅過失，無失落，但有奮心，會改同做得更好。我敢講係比以前積極咗，行動上同心態上都係，個人失落咗嘅自信亦慢慢build up返。呢個行業我真係唔熟，起初撞板同俾人笑，但慢慢我估我應該發揮到作用，依家亦開始慢慢俾身邊人接納、工作得到認同。

你問我鍾唔鍾意呢份工我唔識答，但我肯定呢份工相對自在、實際同有成就感啲。起碼比以前做得開心、自然、舒服。

呢期有個機會俾我，糖衣毒物。既已離開，我真係唔想再跳返入個黑洞，一絲都唔想。但今次係又一案例，華麗嘅表面遮唔住人性自私同貪婪嘅醜惡。就如對方所講，佢嘅主張同邏輯就係想作為董事話得事，揸住股票等套現抽身做自己想做嘅事；apply喺我度，錢同股票我無亦唔係我嘅，但我已經抽身，做咩要笨到幫佢做替死鬼仲有行回頭路攞苦嚟辛?  當日見面過後我個心係笑嘅，可能之前做過Marketing同Selling，佢咁嘅presentation真係好唔掂囉。用完全自利立場嘅point嚟sell再求其開空頭支票諗住打動我唔work囉，哈哈～

我滿唔滿意現狀，我只能話有得有失在所難免。有平心自問有無行錯揀錯，我未有答案。但肯定嘅係，我覺得挖條隧道離開咗個窿重見天地肯定無揀錯。而我就算呢刻失去目前所有，我都信我唔行舊路都可以活得、做得精彩，仲要比以前更精彩。總之只要唔喺嗰個世界，我就能開心，就會成功。