反

好忙。今日係星期五，一個星期先返得嚟一次，但係都要忙到OT遲咗返香港。喺火車上random聽到"十年後的我"，我再無好似半年前咁屈住屈住好down我內疚自責，反而覺得好實在，有種"豁達"嘅感覺...

過去呢5個月的確比半年前辛苦好多。呢5個月真係好似打游擊咁，試過唔知聽日又要打啲乜，下個星期又唔知要去邊，留幾耐。啱啱轉行時乜板都(差啲)撞過，自己一直嗰套好似唔係好work，做咗啲嘢又好似無乜嘢睇，信心係有動搖過，曾經迷茫過我應該點算。直至提前過咗試用期，上司安排我做返啲實質嘅tasks，而做嘅tasks又慢慢見到成果，開始gain到同事嘅信任，先覺得啲嘢順返啲，見到前景嘅曙光。而當時咁啱機緣巧合，半推半就下take咗個當時嘅絕地大challenge，最終在我而言唔係成功，但係件事俾咗好多機會我發揮同磨練。係好艱苦，但係依家諗返，好值得。

咁啱呢個星期頭發生咗啲事，而今日又發生咗一啲事，我呢一刻簡直有種飄飄然嘅感覺。之前過去幾年我顧慮、質疑自己嘅能力今日我夠膽講係唔成立嘅。就好似到咗屋企樓下時咁啱聽到"B面第一首"，我依家有嘅係自信同信心好謙卑一步一步小心翼翼部署籌備我想咗10年都無嘅嗰個機會發揮。放工前臨尾三位大頭嘅工作安排其實係好沉重同會有好大壓力，但相反我覺得亦係推動力，因為對我而言我自覺係一種認同，再辛苦我都會欣然接受。

演畢别人 給的戲份

箱底計劃 今天進行

以後無意 討好各人

隨性去找 被錯過的小確幸