2018年過得好似好平平無奇，都係咁就過咗一年，但諗深一層，睇真啲，其實真係一啲都唔平淡。
阿女第一次大病到要入醫院，肺炎仲要有陰影，嗰一刻真係好驚。喺養和見到佢無嗮氣個樣心真係好痛。真係好好彩，最後都冇事。
年頭嘅兩個決定，年中嗰個action(仲要有手尾)，始終問心有愧，畢生唔會磨滅。好多時，自己孤身一人，靜落嚟，真係唔識面對自己。
今年我返工，工作同之前嘅、同期望預期嘅，都好唔同；今年對我嚟講都係做埋啲無意義嘅嘢。Associate final interview個management game，GBB要我趕餐死翻譯仲要大龍鳳去present啲我不屑嘅低能IE嘢，CU嘅無間19層地獄，PACE嘅無理取鬧reboot又reboot再reboot安排，Translation同Training嘅人如輪轉。作為一個R.P.E，做埋呢啲嘅嘢，真係哀莫大於心死。
不過好好彩，我把握機會今年攞埋最後一個要攞嘅Black Belt，終於完成當年畢業對自己許下嘅承諾，係遲咗，不過遲總好過冇，我終於係一個註冊有專業資格，連埋MBA同Six Sigma Black Belt嘅IE。
而一八年其實我都上咗堂仁生哲學課。唔好奢望身邊人對你好，對對方千祈咪有遐想，要識愛自己錫自己，咪扮好仁最好嘅都留嗮俾珍惜嘅人。所以雖然2018係不知所謂，失去比得到多，但始終埋數都係有得著。
雖則貌似止水平鏡，只不過係波濤翻滾後不留漣漪罷已。
