上個weekend要上S&S Workshop，點知女王突然發病，家人怕我分心，仲隱瞞女王病情。輾轉幾日，高燒退咗，但同一時間竟然出疹，好彩三姨日日過嚟幫手睇住女王，標叔叔同契媽又第一時間煲涼茶同教我哋用芫茜煲水同女王抹身。到咗星期四晚啲疹好似有蔓延跡象，而星期五雖然好似啲疹突然消嗮但係始終帶咗女王去咗睇醫生求個安心。醫生一問，睇一睇，即刻斷症係“玫瑰疹”，小事，連藥都無，虛驚一場。
因為女王病咗而Emama同Mummy又唔喺香港，變咗呢幾日都偷雞喺香港返工。感覺好唔同但係又好親切，始終都係鍾意喺香港生活。而今日，終於可以俾女王喺香港過返啲正常香港小朋友嘅生活，同佢去吉野家食嘢，去Jusco睇玩具，佢扭計要枝長鏟我又唔買俾佢，去到奇趣扭mel mel俾佢，哈哈，好開心。
其實幸福真係好容易，一家人齊齊整整，無病無痛，好安然度過平凡嘅一日，我已經好滿足。
