2010 簡結

最最最開心當然係終於可以一家人齊齊整整喺赤鱲角團圓；仲要係女王對姑姐零排斥。

睇住女王一日一日咁大，好唔捨得，時間過得太快實在太殘酷。

最憂鬱係3月5號，感覺沉重、殘忍，對佢好唔公平，好對佢唔住。我呢一世都唔會忘記呢一日，以後每年呢一日我都會齋戒食齋。

工作方面開始上軌道，層面越嚟越廣，但手手腳腳一個個被調離，仲行咗步以退為進引狼入府，至年底自動請辭，當然好行夾唔送。Evaluation 聽到啲好uncomfortable嘅“安慰”，感覺好噁心，其實有啲嘢唔講都明，講咗反而好ackward；唔講反而無嘢，講咗仲唔舒服，心裡面多條刺。過年睇阿蘇生話7-8月有得升，諗住痴線嘅，升? 上神枱啊!? 點知真係有，但係promoted by一個話我做得好，但係佢對operations係absolutely zero understanding，連efficiency同capacity都攪唔清楚，俾佢認同所achieved而升嘅感覺仲侮辱過evaluation嗰次。升上Manager由始至終都係得啖笑。

10年involved咗幾次Marketing嘅events，幾好經歷，仲第一次就傻下傻下搵到新客接到張堅單，哈哈。

全年最驚險係極地狂奔衝閘走難，掉低行李都要着草逃離荷蘭返香港。

最唔憤氣係火山灰我都可以上到機，但係竟然喺深圳機場因為機場管理無道而上唔到機。GDP勁又點呀? 咪又係暴發戶!

好開心可以融入太太一家，雖然得嗰幾日，但係喺南昌感覺好奇妙，好平和，有種泰然無憂嘅感覺。終於著起嗰件衫，但我發誓下次一定要到我擺我嚮往夢寐以求嗰種。

10年挪返起本書讀MBA，感覺好鮮明，雖然學啲嘢好多都知、都“明”或encountered過，但無好好連匯貫通，take MBA就好似開竅咁。但係縱觀我係同屆最後生，始終有啲驚經驗唔夠跟唔上。Financial Management好難，但係好有用。

年頭Outward Bound一役令我感觸良多，令我反思/重審一直以嚟所做嘅有無“為/謂”、啱唔啱、應唔應該，點樣可以更好，咩先係optima，Leadership等唔等同於Management，自己係咪方向、定位錯嗮，同埋做Leader就算為勢所迫，搵到對organization、objective最好嘅solution，老虎蟹都要堅持，因為只有Leader先可以控制大局。而經跳海一鑊終於知道自己有幾可笑、不自量力，學識唔好“以為”咁多同得個“衝”。

感覺好奇怪，10年特別想返SC，仲要係帶埋阿太同女王，尤其係喺秋天落葉時。

10年好多姿多彩，百般交集，人成熟咗(physically and mentally got old?)，同家人關係好咗，更了解同接受賢內助，而佢亦慢慢進步，越嚟越有homemaker嘅模樣。