(偽)完美男 v 乾物女

好似無頭無尾，但《瑩之光2》真係好好睇，又係嗰句，感同身受。

越睇越似我哋兩個。都係年齡差一大截，都係男嘅經歷多啲，思維超老餅性格又古縮，做乜都要有理由又規規矩矩；女嘅年少無知唔識世界，無嘢做就喺屋企hea爆“不拘小節”，喺埋一齊真係爆過啲處境劇。

其實兩個嚟自唔同世界嘅人喺埋一齊相處真係好唔容易，遷就忍讓係唔夠嘅，要忍耐理解包容同接受，有時仲要狠下心腸改變對方，而且無時無刻兩個都要對前景充滿希望，缺一不可。咁樣磨合之下好自然越變越似對方，形成第三個世界。

面對過去嘅問題，唔可能否認，但只要唔主動撩起，都可保平安。

面對外來衝擊，我諗我除咗會好似部長咁隨之而安，都會檢討過失盡力做好我自己，證明相比之下始終都係我好啲。

點都好，大前提都係想對方開心啲，一齊生活幸福啲。其實抱住咁嘅心態，無嘢係唔可能。就好似阿太以前食嘢超重味，但依家鹹啲都出聲；我以前出門前一定set埋個頭，但係阿太唔鍾意依家咪又係日日連頭都唔駛梳。

唔知如果有第3集呢對會有咩嘢玩呢? 會唔會好似我啲依家咁呢? 哈哈。