奴性性格

一個又一個大頭佛，終於知道原來係個GM得罪兩方勢力人士所以個project先進展無期，而我由多過一個唔同嘅medium聽到個GM其實有心想瀉落我度幫佢善後兼揹鑊。美國班巨頭催到九彩但我其實又無辦法只可以企喺度，諗落唔得掂，惟有將所遭遇同聽到嘅send 封 email report俾美國班老細聽希望佢哋明白我真係做乜都無用，而又真係只有GM先可以解畫，更何況我只係個Engineer，所以要求step out of 呢啲人事關係。

第一個reply我嘅係個同我GM平起平坐但係喺蘇州就要report俾個GM嘅一個美國Director。佢用reply all第一句就叫同時收到我個email嘅人唔好forward出去，之後話好同情我嘅situation，同埋話理解兼同意我可以延長project所需嘅時間，仲會同啲高層反映，更加恩准我可以stay away from GM嗰篤蘇州屎。

第二個回應我嘅係我直屬上司，一個美籍華人。佢星期日打電話嚟話係 personal speaking，呢啲嘢係唔可以black & white，個GM始終都係我老細個老細(但其實係我老細個老細個老細)，呢啲嘢可以講但係就唔可以寫出嚟。我好明白佢嘅善意提醒，因爲爆出去以GM個格我肯定不得好死，但係其實我之前都有諗過呢個possible outcome，只不過反正係唔係都死，我寧願死得清白。

我可能太直又無官場經驗，只係識得以自己角度去衡量件事對公司嘅利與弊，所以有時會攪到自挖墳墓。但係我覺得有時如果真係為咗唔得罪上面而認氣吞聲知錯犯錯，第一我過唔到自己嗰關，第二又會影響唔止我一個，所以我寧可博俾人燉都好過件事萬一爆起上嚟死得仲慘。更何況一世人唔會同同一間公司做人世，所以覺得無需要下下做奴隸獸。